ریاست، سیاست اور حکومت
اس وقت حکومت یا سیاست کو نہیں بلکہ پاکستانی ریاست کو خطرات اور چیلنجز کا سامنا ہے لیکن المیہ یہ ہے کہ پی ٹی آئی حکومت صرف سیاست کررہی ہے۔ ریاست کے معاملات سے مکمل لاتعلق دکھائی دیتی ہے، اسے اس کی سمجھ نہیں، یا پھر جہاں کردار ادا کرتی ہے، وہاں ریاست کے مسائل حل کرنے کی بجائے انہیں مزید گھمبیر بنادیتی ہے۔ رہے حکومت مخالف سیاستدان تو وہ اپنی بقا کی جنگ میں مگن ہیں اور ریاست کے مسائل سے وہ بھی یکسر لاتعلق ہیں۔
اس وقت ریاست کو درپیش سب سے بڑا خطرہ تباہ ہوتی معیشت کا ہے۔ عمران خان اور اُن کے وزرا کچھ بھی کہیں، عملاً اب معیشت کا کنٹرول ان کے ہاتھ میں رہا ہی نہیں۔انہوں نے خود اس کی مہار آئی ایم ایف اور دیگر عالمی اداروں کے ہاتھ میں دے دی ہے۔ ان کے پاس بہتری کا کوئی خاکہ ہے اور نہ اس حالت سے نکلنے کا کوئی منصوبہ۔ وہ معیشت کو صرف اس حد تک چلارہے ہیں کہ موجودہ تباہی کو اپنی نہیں بلکہ سابقہ حکومت کے کھاتے میں ڈال سکیں۔
