ذیابیطس کے مریضوں کو اپنا بلڈ شوگر لیول جاننے کے لیے کسی سوئی کا سہارا لینا پڑتا ہے مگر آئی فون، آئی پیڈ اور اسمارٹ واچ تیار کرنے کے حوالے سے معروف کمپنی ایپل نے ایسی ٹیکنالوجی کی تیاری میں پیشرفت کی ہے جو یہ عمل سوئی کے بغیر کرنا ممکن بنادے گی۔
یہ کمپنی طویل عرصے سے بلڈ شوگر مانیٹرنگ کو ایپل واچ کا حصہ بنانے کے لیے کام کر رہی ہے اور اب اس حوالے سے وہ کامیابی کے قریب پہنچ گئی ہے
مگر ایپل کی ٹیکنالوجی سے نہ صرف ذیابیطس کے مریض اپنی بیماری پر نظر رکھ سکیں گے بلکہ ان افراد کو بھی فائدہ ہو سکے گا جو ذیابیطس کے مریض تو نہیں ہوتے مگر ان کے بلڈ شوگر کی سطح کافی زیادہ ہوتی ہے۔
ایپل کی جانب سے اس حوالے سے کوئی بیان جاری کرنے سے گریز کیا گیا ہے مگر رپورٹ کے مطابق اس منصوبے پر 2010 سے کام ہو رہا تھا۔
رپورٹ میں بتایا گیا کہ اس ٹیکنالوجی پر مبنی ڈیوائس کے لیے صارفین کو کئی سال تک انتظار کرنا پڑ سکتا ہے۔
اس طرح کی ٹیکنالوجی پر مبنی ابھی کوئی بھی میڈیکل ڈیوائس دستیاب نہیں مگر اس حوالے سے کئی کمپنیوں کی جانب سے کام کیا جا رہا ہے۔
